JCAP
الرئيسية » Stories »أندية شباب تواصل لصحة الأسرة: تدريب تنظيم الأسرة والقضايا السكانية
أندية شباب تواصل لصحة الأسرة: تدريب تنظيم الأسرة والقضايا السكانية

بدك تخلفي مافي شي ع كيفك!

كان عمري 16 سنة، كنت لسا بسوريا وكنت بحلم اتزوج من بلد تانية .. اجت ست من الأردن عنا بدها تخطبني وكان معها صورة لإبنها .. ووافقت!

تزوجت،  كان أكبر مني ب 11 سنة، من اول يوم بلشت حماتي تتدخل بعلاقتنا الخاصة وانه لازم نخلف ع بكير ونجيب ولاد كتير لانه لساتنا صغار مع انه وضع جوزي وقتها ما كان منيح وكان عنا مشاكل مادية. من لما تزوجنا اتفقت انا وزوجي انه نأجل  الحمل شوي لحد ما يتحسن وضعنا المادي ...حماتي عرفت اني باخد حبوب منع حمل  وعملتلي مشكلة وخلت جوزي يمنعني .

حملت بطفلي الاول بعد شهرين زواج.. كنت صغيرة كتير وكانوا اهل زوجي مسيطرين علي ومن أول ما ولدت صارت حماتي بدها اياني اجيب كمان طفل مع انه كنت متفقة مع زوجي انه بعد ها البيبي بدنا نستنى شوي.. صار جوزي يستعمل الواقي الذكري بس بصراحة باغلب الاحيان كان ما يلتزم... والنتيجة  طفلين خلال سنتين من الزواج!

قررت، لازم آخد وسيلة منع حمل لو شو ما صار.. المشاكل كانت تكبر اكتر واكتر بيني وبين زوجي  نتيجة لوضع زوجي المادي وتدخلات امه الي بتزيد يوم عن يوم... عرفت حماتي وقالتلي "بدك تخلفي مافي اشي ع كيفك" و ازا ما بدك  تحملي رح اجوز ابني !

اتطلقت، اخدت ولادي معي ..بنتي الكبيرة هلا بصف ثالث وابني بصف ثاني .. زوجي تزوج وصار عنده ولاد .. انا وولادي عايشين لحالنا واهلي بسوريا مو قادرة اوصلهم .. ما بدي اتجوز مرة تانية .. ما بدي حدا يضل يرسملي حياتي ويتحكم فيي!

بحلم ، كل صبية تكون عارفة حقها وانه ما تستعجل عالزيجة بكير.. بدي كل صبية تعرف انه من حقها تخطط مع زوجها  وبس زوجها.. الامور الخاصة باسرتهم وكيف شايفينها في المستقبل.

ام عبدالله، 26 سنة، هي إحدى المتدربات في برنامج شباب تواصل لصحة الأسرة الى جانب 240 شاب وشابة آخرين تلقوا تدريباً مكثفا  على المفاهيم الاساسية المتعلقة بصحة الأسرة والصحة الانجابية والنوع الاجتماعي المنفذ من قبل الصندوق الأردني الهاشمي للتنمية البشرية ضمن أنشطة المنحة المقدمة من مشروع تواصل لسعادة الأسرة، الممول من الوكالة الأمريكية للتنمية الدولية.  بعد انهائها التدريب التحقت ام عبدالله مع بتدريب لتثقيف الاقران كجزء من أنشطة البرنامج لنشر الوعي بين فئة الشباب حول قضايا تنظيم الأسرة والواقع السكاني في المملكة.